दैलेखमा समावेशी शिक्षा तथा वैयक्तिक शैक्षिक योजना निर्माण सम्बन्धी ४ दिने तालिम सम्पन्न भएको छ । युनिसेफ नेपालको आर्थिक सहयोग, समाज जागरण केन्द्र स्याक नेपालको प्राविधिक सहयोग तथा नारायण नगरपालिका दैलेखको आयोजनामा समावेशी शिक्षा तथा वैयक्तिक शैक्षिक योजना निर्माण सम्बन्धी ४ दिने तालिम आयोजना गरिएको हो ।
तालिममा समावेशी शिक्षा, कार्यगत सिमितता, सिकाइको सर्वानुकुलित ढाँचा, कार्यात्मक मूल्यांकन, व्यवहार व्यवस्थापन, लगायतका विषयवस्तु समावेश गरिएको कुरा तालिमका प्रशिक्षक तिलक बहादुर खत्रीले जानकारी दिए । उनले कार्यगत सिमितता भएका वा सिकाइमा कठिनाइ भएका ५ वर्ष देखि १७ वर्ष सम्मका बालबालिकाहरुको सिकाइका सहयोग गर्न वैयक्तिक रुपमा तयार गरिने वैयक्तिक शिक्षा योजनाले विद्यालय तथा घरमै रहेका कार्यगत सिमितता भएका वा सिकाइमा कठिनाइ भएका बालबालिकाको सिकाइमा सहयोग पुग्ने बताए ।
उनले तालिम प्रत्येक शिक्षकका लागि आवश्यक भएकाले सबै शिक्षकलाई प्रदान गर्ने व्यवस्था गर्नु सरोकारवालाले नीति तथा कार्यक्रममा राख्नु पर्ने बताए । यस्तै शिक्षक गीता कोइरालाले विद्यालयमा गुणस्तरीय शिक्षाको लागि तालिमको कार्यान्वयनको अवस्था अनुगमन तथा सुपरिवेक्षण गरिनु पर्ने बताए। उनले नियमित अनुगमन गरेर गुणस्तर सुधारमा सहयोग गर्ने दायित्व सबै सरोकारवालाको भएको बताइन् ।
तालिममा समाज जागरण केन्द्र स्याक नेपालका संयोजक हरिभक्त तिवारीले समावेशी शिक्षा अहिलेको आवश्यकता भएको बताए । उनले प्रत्येक बालबालिका फरक फरक पृष्ठभूमिबाट आएका हुन्छन्, उनीहरूलाई बुझेर शिक्षा दिनु शिक्षकको दायित्व भएको बताए ।
यस्तै स्याक नेपालका कार्यसमिति सदस्य चवानसिंह रानाले समावेशी शिक्षा तथा वैयत्तिक शैक्षिक योजना विद्यालय शिक्षाको विकल्प नभएर आवश्यकता भएको बताए । उनले यो तालिम नारायण नगरपालिकाका शिक्षकहरूका लागि अत्यन्त उपयोगी भएको छ। हामी चाहन्छौं, यस्तो तालिमले शिक्षकहरूमा व्यवहारिक परिवर्तन ल्याओस् र कक्षा कोठामा सबै विद्यार्थीलाई समेट्न सक्ने वातावरण बन्ने बताए ।
कार्यक्रममा नारायण नगरपालिकाका प्रमुख प्रशासनिक अधिकृत रेशम बुढाले भन्नुभयो हामीले शिक्षालाई समावेशी र पहुँचयुक्त बनाउन निरन्तर काम गरिरहेको बताए । उनले यस तालिममार्फत हाम्रा शिक्षकहरूले व्यवहारिक रूपमा सिक्ने मौका पाउनुु भयो जुन तालिमले विद्यालय तहमा सकारात्मक प्रभाव पर्ने बताए ।
समावेशी र वैयत्तिक शिक्षा प्रणालीले सबै विद्यार्थीलाई आत्मसम्मानका साथ सिक्न सक्ने वातावरण भएको नगर उप–प्रमुख तप्ता कुमारी खड्का थापाले बताइन् । यस तालिमले शिक्षकहरूमा आवश्यक ज्ञान र दृष्टिकोण विकास गरेकोमा हामी खुशी भएको बताइन् ।
यस्तै नारायण नगरपालिकाका नगर प्रमुख लोमन शर्माले शिक्षा प्रणालीलाई समावेशी बनाउन यस्ता तालिमहरूको भूमिका अत्यन्तै महत्वपूर्ण रहेको बताए । उनले समावेशी शिक्षा भनेको सबै बालबालिका जसको अवस्था, क्षमता वा पृष्ठभूमि जे भए पनि उनीहरूको अधिकारको शिक्षा भएको बताए । नगरपालिकाले सेवा प्रदायक संस्थाहरु संग समन्वय तथा सहकार्य गरि यस्तो तालिमको आयोजना गरेर शिक्षकहरूमा दृष्टिकोण र व्यवहारिक सिपको विकास गर्न चाहेको उनले बताए ।उनले नारायण नगरपालिका शिक्षालाई विकासको मेरुदण्ड मानेर अघि बढिरहेको आगामी दिनमा पनि यस्ता तालिमहरूलाई निरन्तरता दिँदै, सबै सरोकारवाला निकायसँग सहकार्य गर्दै अघि बढ्ने प्रतिबद्धता जनाए ।
तालिमको उद्घाटन तथा समापन सत्रको सञ्चालन नारायण नगरपालिका दैलेखका बालविकास संयोजक कर्ण बहादुर खत्रीले गरेका थिए । तालिमको सम्पूूर्ण ब्यवस्थापन समाज जागरण केन्द्र स्याक नेपालकी शिक्षा अधिकृत निर्मला खड्काले गरेकी थिइन् । तालिममा नारायण नगरपालिकाका १५ वटा सामुुदायिक विद्यालयबाट आधारभुत तह (कक्षा १–३) मा अध्यापनरत २७ जना शिक्षकहरूको सक्रिय सहभागिता रहेको थियो
Leave A Comment